Ды таго гайгезевсь эрзянь келесь

Чадыковонь 16-це чистэ Инзань буень Поддубное велень хозяйствань лицейсэнть тешкстазель Эрзянь келень чись. Нама, те чинтень анокстамось ушодовсь сеске, зярдо тонавтницятне састь тундонь каникуласто.

    Те чистэнть васня ушодкс класстнэнь марто тейсь тиринь келень тонавтыцясь М.Н.Радаев. Сон ютавтсь урок-путешествия «Кенярксов экспрессэ Эрзянь келень масторга». Тонавтницятне мельспаросо ульнесть станциятнесэ, эрьвасонть топавтсть кодамояк кармавтома-арсема: «Артовкске марто кроссворд», косо тешкстнэнь (букватнень) вейсэндязь, эрявсь муемс артовкссонть невтезь валтнэнь, «Тейть од валт» (буквань полавтозь эли буквань ёертозь максозь валтнэстэ теемс од валт), «Содамоёвкст» (содамс раськень ды авторонь стихсэ максозь содамоёвкстнэнь), «Арсик, содык, муик», «Тонавтнек видестэ панжомо кевкстематнень» (тонавтнесть видесэ – валрисьмесэ – кевкстематнень лангс отвечамо), «Поладык стихенть», «Буквась оргодсь», «Виде аволь виде» ды лият. Нама, сех пек эйкакштнень мельс туссь «ЁЕвксонь кужо» станциясь, косо кунсолость дискстэ эрзянь ёевкст, конатнень налксесть Мордовия Республикань раськень драматической театрань актертнэ.

    Теке чистэнть 13-це чассто лицейсэнть ютавтозель тетянь-авань промкс (родительской собрания), конань кармамодо икеле невтезель эрзянь кельсэ концертонь программа. Концертэнть ушодомадо икеле пурнавозтненень лембе поздоровт марто пшкадсь Ульяновск енксонь эрзянь раськень культурань автономиянь Инзань буень отделениянь прявтось И.В. Смолкин.

    Эрзянь келенть мазычинзэ эйкакштнэ бажасть невтеме эрьва кодамо художественной самодеятельностень номертнэнь вельде. Те стихть: «Чачинь мон эрзякс», Эрзянь кель», «Эрьвась вечксы эсь велензэ», морот ды нурька морынеть, сценкат: «Шайтян левкст», «Рэкетирт», эрьва кодат мизолкст ды ламо лият. Нама, тиринь келенть мазычизэ весеме еёндо а панжови раськень фольклортомо. Тень топавтомга тевс нолдазельть ёевкст, тундонь сееремат, потешкат. А кода васенце классонь тонавтницятне невтизь раськень сеерематнень ды потешкатнень, ламотне залсо аштицятнестэ явсть истямо мель: «Вай, а эдь эйкакшпингсэ, алкукскак, миненекак сырькаенек-аванок еёвтнесть эйсэст, тонавтнесть сынст мартонок!». Лисни, тиринь келентень вечкемась те шкас кадовсь минек оймс-седейс, кемеви, сон зярдояк а лепами.

    Эряви тешкстамс ды еёвтамс сюкпря классонь руководительтненень, конат лездасть эйкакштнэнь туртов анокстамс художествань самодеятельностень номертнэнь. Те Разумовская Н.П., Рауткина Н.Ю., Морозова Л.П., Шабалкина Е.Е., Смолкина Л.Н.

    Инжетнень мелест коряс - весе удалась ладс.

Михаил Радаев.