| Погода |
|---|
 |
| Главная |
|---|
| Новости |
| Знаменитости |
| Подписка на газету |
Косто сась монень тиринь енксонтень, эрзянь келентень ды раськентень вечкемась? Монь сырькаем парсте содылизе тиринь келенть, евтнеманзо ульнесть евксонь кондят: минь бажинек певтеме кунсоломс сонзэ. Евкст, морот, содамоевкст, валмеревкст мазылгавтыльть сонзэ келензэ. Сон евтнесь тенек вирьде ды нармунде, тиринь мастордо ды сонзэ лангсо эрицятнеде, паронь теемадо ды вечкемадо, менельсэ тештнеде ды васоло иневедьтнеде, сексте ды лия мезде. Сеедьстэ сайнесь мартонзо вирев пангс, кстыйс ды тикше-люкшань кочкамо. Кодамо налксемасо минь ансяк эзинек налксекшне! Маряви, удалась каямс монь ойментень тиринь енкстнэнень вечкемань видьмекстнэнь. Сестэ монь седейс-оймес кирвазьскак , нама, тиринь келентень, сонзэ мазычинтень, эсень раськентень вечкемась.
Раськень культурась а вельмевтеви раськень ёжонь апак кепеде. Васенцекс кельтементь, эрийкс тиринь кортамовтоманть. Келесь невти раськенть ежомарямонзо. Арась келесь – арась народгак. Раськесь эри знярс, зярс сон вансты эсензэ лемензэ ды келензэ, коензэ- иланзо, а стувтни эсензэ покштянзо ды пазонзо. Ули рузонь кель, эрзянь кель, улить народт, и монь мелем, штобу неть кельтне ды раськетне эряст, цветяст прок цецят клумба лангсо.
Балкаронь раськень сёрмадеенть Танзиля Зимакуловонь шкинемасо ули истямо арсема:
Чудить седейган кавто домка лейть,
Келейгадсть, теке вейке инелей:
Чачом келенть стувтса – кундаты келем,
Рузонь кельтементь потомить пилем.
Эрзянь кельсэнть кортыть малав котосядт тёжат эрзят, конат эрить Средней Поволжиясто саезь Рав низовьянть видьс. Ули минек и гайниця литературань кельгак, конасонть арсезь ды сермадовить течинь чис (Пазчангодть Инешкипаз) литературань произведеният. Эрзятне, эряви тешкстамс, пингеде пингес ероковт поэтической смустьсэ. Аволь чаво таркасо жо чачсь «Масторава» эрзянь эпосось: эрзянь келесь, сонзэ чевтечись, морамонь вайгель лувось ды чачось (образность) – те поэзиянь тёшкс. Зярдо ловнат эрзянь раськень устной народонь творчествань сёрмадейтнень ды поэтнэнь шкинемаст, саят мель, што эрзянь литературань келесь эри ды карми эрямо пингеде пингес.
Течи молить кортамот ЕМЯ –нь (единый мордовский язык ) теемадо. Виде, кавто малавикс раськетне, эрзя ды мокша, ютасть эрямопингень стака китнень то вейсэ, то башка. Но ютасть малав 1500 иеть, кода эрясь вейке мордовской келесь. Те шкас эрзянь ды мокшонь кельтнесэ таштавсть ламодояк ламо лиякстомат фонетикасонть, лексикасонть, грамматикасонть. Малав сядо иеть ютась («Чинь стямо» васенце газетась лиссь 1920 иестэ), кода тевс нолдавсть эрзянь ды мокшань литературань кельтне. Ды кода сынст вейсэндямс? Саемс юрокс эрзянсенть (65%-70% «мордватнеде» эрзят). Мокшотне ловносызь тень а виде тевекс. Саемс юрокс мокшонть (Мордовиясо седе ламо мокшот), пек покордавить эрзятне. Эдь кавонест кельтне эсь койсэст вадрят ды мазыйть.
Кода улемс? Човорямс…50 на 50…
Скал – тракс, реве –уча, чокшне – илядь, ривезь – келазь, вечкема –кельгома, пель –ковол, умок –кунар, покш- оцю, арась –аф. Ды седе тов. И мезе лиссь? Човорявкс… Ды эрямонтеньгак ЕМЯ-сь а нолдави. А седе ли паро ярмактнень, конат алтавить ЕМЯ-нть теемас, нолдамс тевс течинь эрий эрзянь ды мокшонь кельтнень ванстомас ды келейгавтомас?
Радай Михал, эрзянь келень тонавтыця.
