Ульяновской енкссо эрить ламо кельсэ кортыця раськеть. Мошэрзятнеде лововить 50229. Эрить башка велева, косо те шкас ванстовсть кезэрень шкань койтне- кирдатне. Истямо веле ули Кузоватова буесэ, лемезэ Кивать. Мазый, паро таркасо ашти велесь. Кедеть келемтьсыть – вирьс токат, икелев эйсэст аволдат – лейс нерьгстават. Пандо чиретнестэ эрексиякс чавить лисьмапрятне. А стяко, маряви, велесэ чачозесь-касозесь оймева свал кадови велень ломанекс.

    Умарьковонь колмоце чистэ Киватьсэ ютавтозь мокшэрзянь фольклоронь фестивалесь «Масторавань морот». Пек сюпавт ды вейке-вейке енов а молицят Россиясо эриця раськетнень культураст. Берянь ансяк се: неть культуратне кармасть емамо. Фестивалесь эсензэ икелев путсь бажамо: одов вельмевтемс сень, мейсэ сюпавольть минек раськетне. Сонзэ пурнамсто ламо вий путсть Ульяновской енксонь культурань ды архивной тевтнень коряс департаментэсь, Ульяновской енксонь национальной культурань вельмевтемань ды кемекстамонь коряс центрась, МО «Кузоватовской райононь» культурань отделэсь, Ульяновской енксонь национально-культурной автономиясь. Ламо ломанть састь велентень ды эрьва ендо. Фестивалев сыцятнень ветизь велева, невтизь церковаст, святой чудикерьксэст. Областень духовенствась баславизь пурныцятнень паро тевенть ушодома коряс. Седе тов вастовомась ютавтозель рузонь ярмунка ладсо, косо ульнесть и морот, и налксемат. Скоморохтне ды коробейниктне весень тердсть прякань, позань рамамо, эсь виень-ёрокчинь варчамо. Пейдемат-раксемат, налксемат-киштемат – весе те паролгавтынзе пуромозтнень ежост. Мельс тусь мокшэрзянь подвориясь. Те покш комплекс, чапозь XIX пингень койсэ, потсо пурназьгак кезэрень шкань коряс. Сон сыремти весемень ойметнес раськень культурань кандыцянь толнэ. Ютавтови ярмарка-микшнема. Тесэ ульнесть ярсамопелень товарт, кедьчелькев ломанень теевкст. Участниктне ды инжетне выставкасонть-дегустациясонть варчизь эрзянь национальной ярсамопелест. Важодить колмо таркат: эйкакшонь, спортивной ды «Налксек, гармония!» Тосо ютыть спортсо ды налксемасо конкурст. «Торама» ансамблясь лецтизе, кода седикеле эрзятне лиснесть веле ушов, сакшность лей чирев ды ютавтсть «Велень озкс». Теке понгинек Тюштя пингень шкантень, зярдо эрзятнеде ульнесть ламо ды сынь ульнесть виевть. Вейке-вейкень эйстэ васолга эрязь, эрзятне ды мокшотне кармасть стувтомо тиринь келест, ве енов ертомо эсест коест. Гайгевстэ тердиця вайгельсэ седить кезэрень шкань седямопельть. «Эрзят, мокшот, пурнаводо!» - теке тердить сынь. Весе пуромозетне эзть лотксе цяпамо, сынст кунсоломсто.

    Фестиваленть панжизь Кузоватовской райононь прявтось В.В.Ковель, райононь отделениянь мордовской автономиянь председателесь А.Н.Вильчик, сонже Кузоватова буень администрациянь прявтось. Ульнесть инжеть Мордовиястояк. Ютксост – культурань министрась П.Н.Тултаев, Госкомитэтэнь прявтонь полавтыцясь А.И.Карьгин, Финно-угорской центрань отделэнь начальникесь Р.Б.Щанкина, кинофондонь директорось А.П.Голованов, ученоесь Н.Ф.Мокшин ды лият.Ульяновской областень правительстванть пельдеяк састь покш инжеть. Ютксост – Правительствань Председателенть васенце полавтыцязо А.П.Пинков, Госдумань аграрной кевкстемань комитэтэнь прявтось В. П.Денисов, Правительствань Прявтонть полавтыцясь Т.В.Девяткина ды лият. Те корты, кода тешкстызе А.Н.Вильчик, кода иестэ иес касы-покшолгады неть фестивальтнень питнест. Пуромозотне седейшкава вастасть эрьва кортыцянть. Седеяк покш мельсэ кунсолость эрзякс кортыцятнень. Лисни, сынь допрок кортавольть эсест кельсэ.

    Кодамо покшчи моровтомо? Сынь гайгсть апак лотксе. Састь морыцят 8 буестэ: Вешкаймской, Николаевской, Инзенской, Кузоватовской, Павловской,Радищевской, Сурской, Тереньгульской, Пенза, Саран ды Ульянов ошсто. Программасонть ульнесть киштицят, эрзянь, мокшонь ды рузонь морот. Концертэнь перть ваныцятне весе вийсэ цяпасть ды кой-кить киштсть артистнэнь марто. Тенст вечкевсь лия енов а молиця ансамблясь «Торама».Лембестэ вастызь Мордовиянь Заслуженной морыцянть Нина Спиркинань ды киштемань ансамблянть «Арсема». Пек цяпасть Заслуженной артистнэнень В. Морозованень (Пензань) ды Н.Лемаевнень (Тереньга буень). Ламо вийть путсть покш чинть анокстамонтень Кузаватова буень культурань отделэнь прявтось О.В. Емельянова, МО «Кузоватова буень» прявтонть полавтыцясь А.Н.Козырева. Фестивалень варштамо сакшнось Ульяновской енксонь Губернаторось С.И. Морозов. Покш сюкпря ды шумбрачи Кивать велень прявтнэнень ды эрицятненень. Максозо Вере пазось тенст уцяска, паро эрямо, семиясо седеймарямо ды вадря превть. Весе, кить сакшность фестивалев, кадовсть покштояк покш мельспаросо. Истят фестивальтне пек эрявить, сынь седеяк пек малавгавтыть Россиясо эриця раськетнень. Ламот евтасть кемема: сынь улить поладозь. Арсетяно, истя карми улемеяк.

Сермадызе Т. Клеянкина.